ATSUM-in kawng-pui dan chhunzawm

All Tribal Students’ Union Manipur (ATSUM) chuan an thil phut nawrna atana kawngpui an dah chah chu an chhunzawm zel.

June 22 zan aṭangin ATSUM hian Manipur-a National Highway pathum- NH-2 (Imphal-Mao), NH-37 (Imphal-Jiribam) leh NH-150 (Imphal-Chu­rachandpur) te an dang­chat a, state sorkarin an thil phut a tihhlawhtlin hma chuan chhunzawm zel an tum thu an tarlang.

ATSUM social and culture secretary Valan Aimol chuan kawngpui an dan chah avanga mipuiin harsatna an tawh chu an hriatthiam thu sawiin, mahse state sorkarin an thil phut a tihhlawhtlin theih loh avangin nawrh an chhunzawm a ṭul thu a sawi.

Kawngpui dangchata nawrh an huaihawt aṭanga ni ruk a liam hnuah pawh state sorkarin anmahni an la be duh lo tih a sawi a, ngawrh zawka kalpui zel an tum thu a sawi bawk.

ATSUM president Muan Tombing chuan Mani­pur tlangram biala contract lecturer 286 leh Adhoc teacher 333 te tihngheh an phut bakah Schedule Tribe Commi­ssion din, Imphal-a Jawa­harlal Nehru Institute of Medical Sciences Hos­pital-a ST seat leh state Legislative Assembly Sec­retariat-a ST seat hnawh­khah te an phut thu a sawi.

Manipur tribal zirlaite hian tlangram biala higher secondary school zawng zawngte chu an khartir tawh bakah national project kalpui mekte an chawlhtir bawk.