Assam-in AIIMS nei dawn: Union Health Minister

Union Health Minister JP Nadda chuan Assam-in All India Institute of Medical Science (AIIMS) a neih tur thu a sawi.

Kar kalta Inrinni khan Guwahati-ah Union Health Minister Nadda chuan hmar­chhak state pariata health minister te review meeting a neihpui a, meeting zawha thuthar thehdarhtute a kawm­naah Assam-in AIIMS a neih thuai tur thu hi a sawi. Hmarchhak biala Centrally Sponsored Scheme (CSS) hnuaia health programme hrang hrang kalpui mekah fund chu harsatna a nih loh tur thu a sawi bawk.

Nadda chuan Infant Mortality Rate (IMR), Maternal Mortality Rate (MMR) leh Total Fertility Rate (TFR) tihhniam chu hmarchhak bial tan chona hmasa tihpuitlin ngai a ni, a ti a.

Sorkar laipuiin CSS hnuaia funding pattern 90:10 a thlak tia hmarchhak state te'n sawi chu thu dik lo a ni tiin funding pattern tihdanglam a nih loh thu a sawi bawk.

Assam-a damdawi ma­mawh a awm loh ṭhin chung­changah Nadda chuan state sorkar chu damdawi supply tichatlak lo tura hma la tur a ni, a ti.

State sorkar te chu central ministry, department leh agency te ṭha taka thawhpui tura sawmin, hmarchhak biala programme hrang hrang kalpui mekah thawhhona ṭha lo chu harsatna thlentu a ni, a ti.

Union Health Minister chuan hmarchhak bialin damdawi lama inenkawla changtlung tak a mamawh thu sawiin, state sorkar chu inkalpawhna tihchantlun lam ngaipawimawh hmasa tura a duh thu a sawi.

Assam-a AIIMS din tur chungchangah Assam sorkarin a dinna tur ram a tihfel hunah sorkar laipuiin bawhzui nghal a tum thu a sawi.

"AIIMS dinna atan Assam sorkar chuan ram remchang hmun hrang hrangah min kawhhmuh tawh a, mahse tihfel a la ni hlawm lo," tiin a sawi.