Manipur Cabinet-in Railway-a thawk tur post 580 lak remti

Manipur cabinet meeting chuan Railway-a thawk tur post 580 lak a remti. Heng post-te hi Government Railway Police Station pali leh Jiribam-Imphal rail line, out-post paruka thawktu turte an ni ang.

Cabinet meeting hi Inrinni khan CM Secretariat-ah neih niin Chief Minister chuan a kaihruai a ni. Rural Development and Panchayati Raj minister Moirangthem Okendro chuan Jiribam Imphal rail line-ah venhimna khauh zawka kenkawh a nih theihna turin Jiribam, Thingou, Noney leh Imphal-ah te Government Railway Police Station din a nih tur thu a sawiin, Dholaikhal, Kaimai Road, Kambiron, Khongsang, Tupul leh Hao Chong-ahte out-post din a ni ang, a ti bawk. Heng hmuna thawk tur hian cabinet chuan mi 580 lak a remti a, hmalakna a kal mek a ni, a ti.

Cabinet chuan sorkar school enkawl high school leh higher secondary school zinga LDC/ office assistant awm lohnaah office assistant pakhat ṭheuh dah a remti. Manipur-ah hian sorkar enkawl high school leh higher secondary school 211 a awm a ni. Heng bakah hian contract basis-in advocate (OSD/ Legal) paruk lak cabinet chuan a remti a, Sangaiyumpham High School leh Bengoon High School te chu upgrade a remti bawk. Minister chuan SI Monika Devi chu Inspector rank pek a remti a, hetih lai hian hel pawl aṭanga sorkar kuta inpe mi 18 te chu sorkar hna pek a tiam niin a sawi bawk.