Meghalaya Police-ten pawikhawihna thlentu finfiah

Meghalaya police te chuan kar kalta Thawhlehnia Primary zirtirtu thah a nih dan an chhuina kal zelah, pawikhawihtute chu Garo National Liberation Army (GNLA) te an ni tih an finfiah thu an sawi.

He pawikhawihnaa inhnam-hnawih GNLA chief Sohan D. Shira leh a thurualpuite chu man tumin an zawng mek a, Sasatgre-ah Sohan-a mobile phone an chhar a, amah leh a thurualpui ṭhenkhat chu Sohan-a nu inah an tawm nia hriain an bei zui a, inkahna a thleng zui tih district police chief Davis Nestell R. Marak chuan a sawi.

Jinggamgre SSA LP School headmaster Madison Ch Marak hi Thawhlehni zan khan a chenna in aṭangin GNLA te hian hruai chhuakin, an that zui a ni. He thil thleng hi Police te chuan chhui nghalin, GNLA te thil tih a nih thu an tih an sawi. Police-ten GNLA an umzuina lamah hian minute 15 vel chu an inkap zui nia hriat a ni a, a hnuah hel te hi an bibo zui ta a ni. Sohan-a leh a hote hi Durama Hills-a ramngawah an tlanchhia niin police te chuan an sawi. Police te chuan Sohan-a mobile phone pahnih an man tih sawiin, hengah hian thlalak leh video eng emaw zat hmuh tur a awm tih an sawi bawk.

Hetih lai hian East Garo Hills students’ union te chuan primary school headmaster Madison Ch Marak thah a ni chu an dem thu an sawi a, a chhungte thinlung taka an tawrhpui thu an sawi.