Ratan-a Police Custody-ah ni kaw chhung awm turin ti

Manipur Court chuan Joint Committee on Inner Line Permit Systems (JCILPS) hruaitu hlui Khomdram Ratan chu ni kaw chhung police custody-a awm turin thupek a chhuah.

Judicial Magistrate First Class, (JMIC) Imphal West Alex Muivah chuan Ratan-a 'remand order' hi a tichhuak a ni. Ratan hi tun hnai khan Imphal-ah man a ni a, police te chuan a lakah hian thubaui 75 an ziak lut tawh. Court chuan August 2 khan Ratan-a lakah hian non-bailable warrant a lo tichhuak tawh bawk. Ratan hian helpawl United National Liberation Front (UNLF) flag kengin he pawl tan hian thu a tiam a, a rual hian midang pathum te chuan thu hi an tiam ve bawk nia sawi a ni.

Ratan hi police custody-ah ni 15 awm tura tih ni mah se court chuan a rei lutuk tiin, ni kaw chhung atan a tihtlem sak. Ratan-a thubuai chungchangah hian JCILPS leh Manipur sorkar chuan inremna ziakin, a thubuai 75 chu state sorkar chuan nikum Septrember khan hnuhkir a lo remti tawh a ni. JCILPS Women Wing convener ṭhin Nganbi chuan Chief Minister Okram Ibobi Singh chu Ratana-a bail-a chhuah a nih theih nan hma la turin a lo ngen tawh.

Hetih lai hian Ratan chuan darkar 48 awh General Strike neih chu a thlawp thu a sawi. Joint Action Committee convener Kh Thoiba chuan lungawi lohna an lantir chhan sawiin, state police ten Keishampat Leimajam Leikai community hall-a Khomdram Ratan an man dan chu mihringte dikna rahbehna a ni, a ti. Ratan hian ILP hmang tura sorkar kar nana hunger strike kalpui chu thlawpin, chaw nghei a kalpui a, mahse reilote hnuah police te chuan an man zui a ni. ILP hman phuta chaw nghei kalpuite hi MLA Laishom Ibomcha leh BJP MLA Kh Joykishan te chuan an tlawh a, an harsatna te an lo sawipui a ni.

Thoiba chuan police te chet dan chu a dem thu sawiin, JAC te chuan darkar 48 awh nawrh an huaihawt ta tih a sawi.