Rajnath leh Parrikar-a'n NE security dinhmun ennawn
Union Home Minister Rajnath Singh leh Union Defence Minister Manohar Parrikar chuan hmarchhak biala venhimna dinhmun ennawnin Thawhṭanni khan meeting an nei.
Manipur Chief Minister Ibobi Singh leh Arunachal Pradesh Chief Minister Nabam Tuki chuan tun hnai khan an state chhung ramri biala venhimna khauh zawka kalpui a pawimawh thu Union Home Ministry-ah an lo thlen tawh a ni.
Hetihlai hian Defence Minister Parrikar chuan Home Minister Singh chu Uttar Pradesh kaihhnawih thil a sawipui thu a sawi thung.
Sorkar laipui senior official chuan meeting-ah hian hmarchhak bial venhimna chungchang pawh sawi a ni, a ti a, Parrikar chuan Myanmar-a hmarchhak helte laka beihpui thlak a nih hnuah khawthlir thlak danglam a duh a ni, a ti.
Thawhṭanni vek khan Union Home Minister Singh chuan National Security Advisor Ajit Doval, Intelligence Bureau official leh Research and Analysis Wing (RAW) official te chu hmarchhak bial venhimna chungchangah meeting a neihpui bawk.
Khaplang-a kaihhruai, Nationalist Socialist Council of Nagaland (NSCN-K) helte avangin Manipur leh Nagaland a ralmuang lo hle a, hei vang hian sorkar laipui leh state pahnih sorkar chu a inralring reng a ni. NSCN (K) helte hian Manipur Chandel district-ah June 4 khan 6th Dogra regiment te lambunin, sipai 18 an kaphlum a ni.
MHA-in ramri venhim kawngah mawhphurhna leh thil ṭul buaipui ngai tam tak a neih avangin NSCN (K) laka beihpui thlak dan tur hi Cabinet Committee on Security chuan a ngaihtuah rin a ni.