China ramria kawngpui 82% siam zo lo

Sorkar laipui chuan China ramria kawngpui 73 sialna tur a pawmpui tawh a, heng zinga 82% chu kum 2012-a siam zawh tura ruahman ni mah se tun thlengin peih fel an la ni lo.

Ram venhimna atana ruahman kawng­pui peihfel nan sorkar chuan hun a bithliah thar a, kum 2018-a peihfel hman beisei hman a ni.

India leh China hian ramri kilometre 3,488-a thui an inṭawm a, ram venhimnaa infrastructure siam kawngah India hian China a umpha lo hle.

India chuan China ramriah venhimna tihchak tumin Himalaya tlangdunga-a China sipaite laka ram venghim tur sipai 35,000 dah belh a tum a, sipaite supply pek nan kawngpui ṭha sial a tum bakah rel kawng 14 siam a tum bawk.

Ram inchuh thubuaiah India leh China inkar boruak chu ṭha angin lang mahse China hmalak danin India a tibuai nasa hle. Prime Minister Narendra Modi chuan, "India-China ramri chu ram ralmuang lo a ni lo a, silai mu pakhat pawh kahchhuah lohin kum 25 dawn kan awm tawh a ni," tiin China a tlawh ṭuma TIME magazine-in a kawmnaah a sawi.

Modi leh China Premier Li Keqiang chuan inhriatthiam lohnate chu inbiaknaa chinfel zel an tum leh ramriah remna leh muanna boruak thlentir zel an duh thu an sawi tawh bawk.

Hetihlai hian Union Home Mi­nis­try report chuan kum 2010 leh August, 2014 inkarah China si­pai­te chuan dan bawhchhiain vawi 1,612 chuang India ram an lut a ti.