Assam ṭhalaite'n Sorkar hna an duh ber

Assam magazine Jeevan-in zirchianna a neiah Assam ṭhalai zinga 47%-in sorkar hna chu eizawn nan an la duh ber.

Jeevan survey question chhang­tu, Assam ṭhalai 65% chuan zirlai pawlte chu an ai an awh zo lo leh an beiseina tipuitling thei loah an ngai bawk. Ṭhalai 79% chuan an thil tih duh avang ringawtin an chenna-in leh an chhungte kal chhuahsan an duh lo bawk.

Assamese tihin a hnam a huamte leh Assamese hrilhfiahna chungchangah 38% chuan National Register of Citizens (NRC) 1951 chu Assam hrilhfiahnaa ṭan­chhanah hman an duh a, hetihlai hian 36% chuan Assamese hnama telh turah March 25, 1971 electoral roll tlawhchhan an duh thung. Assamese hnama telh leh telh tur chungchang hi 20% chuan zan mut theih loh nan an hman phah bawk.

Bangladesh aṭanga dan phal loha Assam-a pemlutte avanga harsatna chu 31% chuan India-Bangladesh Land Boundary Agreement hmanga chinfel theih an beisei a, hetihlai hian LBA kalpuinaah 48% chuan Assam ram chu Bangladesh laka hloh an duh lo thung.

Sa pel ru ṭhin te'n samak an kahhlum ṭhin chungchangah 51% chuan state sorkar chu ramsate veng him tura mawhphurtu a ni, an ti a, samak kahhlumna thlengah state sorkar chu a mawhphurtuah an ngai bawk.

71% chuan Brahmaputra lui chu Assam civilisation, culture leh economy-a hmasawnna thlen theituah an ngai a, 9% chuan Brahmaputra tuilian avanga chhiatna thleng ṭhin chu anchhiaah an ngai thung.

Assam ram zalenna phuttu, ULFA hel hotu Paresh Barua chu 7%-in an hre lo a, 48% chuan mi hmanrua maia an ngaih bakah Assam tan danglamna thlen thei turah an ngai lo. 17% chuan Assam-a a let leh ngei an ring bawk.

School leh college-a Assamese subject compulsory-a dah phutna chu 86%-in an thlawp.

38% chuan mobile phone-in ṭhalaite a tibuai an ti a, 49%-in social media chu hun khawhralna maiah an ngai bawk. 30% chuan social media tel lo chuan nun a harsa an ti thung.