Tripura CPI-M-in Pratap-garh leh Surma bial a hum

Tripura-a rorel lai CPI-M chuan Pratapgarh leh Surma Assembly biala by-election-ah seat a hum.

By-election hi June 27 khan neih a ni a, CPI-M hnungah BJP awmin pahnihna a ni a, Tripura-a eptu party lian Congress party a che chhe ber thung.

Pratapgarh bialah hian CPI-M hi a zawna vawi kua a chakna a ni a, Surma bialah a zawnin vawi riat hnehna a chang bawk.

Pratapgarh bialah CPI-M candidate Ramu Das chuan amah hnaih bertu BJP candidate Mousumi Das chu vote 17,326-in a hneh. CPI-M candidate hian vote 27,555 hmuin, BJP-in vote 10,229 a hmu a, Congress candidate Ranjit Kumar Das chuan vote 5,187 chauh a hmu thung.

Surma bialah CPI-M candidate Anjan Das chuan BJP candidate Ashish Das chu vote 15,309-in a hneh. CPI-M hian vote 23,275 a hmu a, BJP-in vote 7,966 leh Congress candidate Nagendra Chandra Biswas-in vote 2,528 a hmu.

CPI-M minister hlui pahnih- Anil Sarkar (Pratapgarh) Sudhir Das (Surma) te an thih avangin an aiawh thlan nan by-election neih a ni.