Meghalaya: Tolegre khuaa fossil rukbo a ni

Meghalaya-a South Garo Hills-ah kar khat dawn liam ta khan Tolegre khua aṭangin fossil ruk chhuah a ni. Police-te chuan pawikhawitute leh inhnamhnawih te hi an la chhuichhuak thei lo.

South Garo Hills Superintendent of Police (SP) Shailendra Bamaniya chuan Thawhṭanni khan he thil bo chungchangah hian khaw mite statement a lak sak.

Case hi January 28 khan ziah luh chauh a ni a, FIR pahnih thehluh a ni bawk. SP chuan chhui zui mek a nih thu a sawi.

Tu tih hriat loh ten helai huamchhung an luh hnuah fossil hi a bo chhunzawm a, an ruk bo aṭangin ni tam tak a liam tawh a, senior official -ten a hmun an tlawh ṭum in rukbo a ni tih an hre ve chauh a ni.

Tolegre khua leh a chhehvel khaw pasariha khawtlang hruaitute chuan Geological Survey of India (GSI) te chu a ru bo tu ah an puh.

Fossil rukbo a nih hnu hian Tolegre, Jadigindam, Paromgre, Emangre, Asakgre, Dabalgre leh Nokatgre khawtlang hruaitute chuan Inrinni khan meeting an nei a, tun hnuah chuan helai hmuna kal phal lohna dan siam a ṭul thu an sawi. Pawl aiawha thupuangtu, Altar R Marak chuan GSI team chu phalna nei loin helai hmunah hian an rawn kal a, fossil rukbo pawh a thleng ta a ni, a ti. "Kan ram chhungah phalna nei lo leh in hriattir lawkna awm loin an rawn lut a, kan remtihna nei lo leh phalna loin heng fossil te hi sample atan an rawn hmang a ni," tiin a sawi. Khawtlang hruaitute chuan FIR pawh pahnih a hran a an thehluh thu an tarlang. Hei bakah hian fossil rubo tute chhuichhuah an nih hma chu puk chhungah hian tumah kal an phal lo tih an sawi nghal bawk a ni.