Sikkim: Sikkim Krantikari Morcha (SKM) in Foundation day lawm

Sikkim-a rorellai party, Krantikari Morcha (SKM) chuan February 4 khan state chhung hmun hrang hrangah Foundation Day vawi 13-na an lawm. An party-in rorelna dik, hmasawnna leh Sikkim mipuite tan hamṭhatna tam tak an siamsak tawhte an pholang.

Foundation Day lawmnaah chief minister leh SKM president, Prem Singh Tamang chuan Sikkim mipuite chibai bukin, party member-te inpekna leh party tihchak kawnga theihtawp an chhuahnaah lawmthu a hrilh.

CM Tamang chuan Sikkim thlak danglam nana an party lo chhuah dan leh theihtawp chhuaha an beihnate a sawilang. February 4 chu inhnehchhiahna leh rorelna dik lo huaisen taka an dona champha a nih thu a sawi a, "Kan hma hun lo awm zel tur atana dinchhuah leh beidawn loh chu kan tum ber a ni," a ti. Huaisenna leh inpekna nen Sikkim Krantikari Morcha chu mipuite rorelsak tura din a nih thu a sawi bawk.

SKM chu political party mai ni loin rorelna dik, zahawmna leh Sikkim mipui zawng zawng ang khata entu a nih thu CM chuan a sawi a, democracy rama mipuite rinna tih ngheh leh dik taka rorel bakah Sikkim khua leh tui dikna chanvo humhalhtu an ni tih a sawi bawk. Kum 13-na an lawm ni ah hian an tana ding tlat leh mi inpe te bakah Sikkim hmakhua ngaitu zawng zawng te an hriatreng thu a sawi bawk a ni.

SKM hmathlir tih hlawhtlin kawnga mi in pete leh an hun hlu tak senga theihtawp chhuahtu - State, District, Constituency, Block leh Ward-level Committee member- te chungah leh Karyakartas-te chungah lawmthu a sawi.

Tamang chuan kum 2019-a an party-in ro an rel aṭangin hmasawnna tam tak an siam tawh thu leh mipui dinhmun an chawikan nasat thu a sawi bawk. SKM chuan healthcare, zirna, hna, tourism te a dah pawimawh thu a tarlang a ni.