Assam: Assam CM-in PM Modi hmu

Assam chief minister Himanta Biswa Sarma chuan Thawhṭanni khan prime minister Narendra Modi chu Parliament House, Delhi-ah hmuin, state sorkar hmalakna leh investment chungchang a sawipui.

Meeting-ah hian Chief Minister Sarma chuan, Namrup-a urea plant dah phalna Prime Minister Modi-a'n a pek avanga lawmthu hrilhin, state-in hmasawnna kawnga ke a pennaah nasa taka a puih thu a sawi bawk.

Advantage Assam 2.0 Summit lo awm tur pawh sawilangin, CM Sarma chuan PM Modi kaihhruaina a dawn avangin lawmthu a hrilh a, investment leh infrastructure summit an neih hma ni hian Jhumur performance buatsaih a nih tur thu a hrilh. Advantage Summit 2.0, February 25-a neih turah leh, Jhumur dance performance, Sarusajai Stadium, Guwahati-a neih turah PM Modi hi khuallian a ni dawn a ni.

CM Sarma chuan a micro-blogging platform-ah thuchhuah siamin, Assam mipui aiawha Prime Minister a hmu thei chu lawmawm a tih thu chu sawiin, sorkar laipuiin Urea Plant, Namrup-a dah a remtih sak avangin lawmthu a sawi bawk.

Sarma chuan Thawhṭanni khan union finance minister Nirmala Sitharaman pawh Parliament House-ah hmu nghalin, duhthusama ṭha budget a pharh avang leh middle class leh sumdawng tenau zawk sorkarin a ngaihsak avangin lawmthu a hrilh bawk. Mega Advantage Assam Summit 2.0 pawh Union Finance Minister nen hian an sawi dun a, Union Minister Sitharaman pawhin telpui ngei a tum thu Chief Minister hi a hrilh a ni.