Sikkim-ah Covid-19 vangin Health worker a thi

Sikkim-a STNM Hospi­tal-a assistant nursing superintendent (ANS) chu nimin zing khan Covid-19 vangin a thi a, an state-a hripui vanga  health worker thi hmasa ber a ni. 

Kum 49 mi, nurse hi Daragaon, Tadong-a mi a ni a, hospital-ah hian emergency ward-ah duty ṭhin a ni. Kar hnih dawn chu damdawi-ina enkawl a nih hnuah Sep­tember 15 khan chhuah tir a ni a, mahse Nilaini zan khan damdawi-inah dah leh niin ventilator hman ngaiin a awm zui nghal a ni. Nimin zing dar 2.30 khan a thi ta a ni. 

Health director general Dr Pempa Tshering Bhutia chuan hri dona thawktu pawimawh tak an chan ta chu pawi an ti takzet tih a sawi a, mahse hri leng mek avangin thlahna hun pawh an duh angin an siam thei dawn lo tih a sawi. 

A inpekna chu an hre reng tawh dawn tih sawiin, sorkar laipuiin kaihhruaina a lo siam tawh angin a chhungte  hnenah ralna cheng nuai 50 pek a ni dawn tih a sawi. 

Sikkim-ah hian nimin thleng khan hri kai hmuh chhuah tawh hi mi 2,774 a tling tawh. An zinga 1,789 chu enkawl dam ni tawhin, mi 23 in an thihpui tawh bawk. Sample test neih zat hi 46,065 a tling tawh bawk a ni. 

Manipur-ah Ningani khan  hripui vangin  mi pathum an thih belh leh a, an state-a hri pui vanga thi hi mi 51 an awm tawh a ni. 

Ningani khan hri kai hmuh thar mi 110 an awm leh a, anni nen hian hri kai hmuh tawh hi 8,430 an awm tawh. Hemi ni vek hian hri kai enkawl dam 18 awm lehin recovery rate hi 77.56%  a ni. 

Hri kai  hmuh tawh zinga mi 6,539 chu enkawl dam an ni tawh a, hri kai mek 1,840 an la awm.