Nagaland sorkarin Vawk lakluh khapna a thlahdul

Nagaland sorkarin an ṭhenawm state, Assam-a  African swine fever (ASF) len vanga state dang aṭanga vawk lakluh khapna thupek a siam chu Nilaini aṭang khan a thlahdul. 

Department of Animal Husbandry & Veterinary Services chuan April 28-a vawk lakluh  khapna siam chu thlahdul a nih thu a sawi a, Punjab leh Haryana aṭanga vawk lakluh phal a nih thu a sawi. Hemi rual hian Assam, Arunachal Pradesh leh ASF hmuhna state dang aṭang erawh chuan lakluh a la remti lo tih a sawi. 

Vawk lakluh khapna a thlahdul rual hian sorkar chuan vawk lalut turte tana zawm tur kaihhruaina a siam nghal bawk. State an phalsak aṭanga vawk an lakluhte chu Assam-ah an chawlhpui tur a ni lo a, vawk phurtu motor-te pawh damdawi hmanga kah thianghlim vek tura tih a ni. 

He dan zawm lote chu pawisa chawi tir bakah an vawk phurh pawh man sak theih an ni ang.