'Milk Revolution' kalpui a hun : Assam CM

Assam Chief Minister Sarbananda Sonowal chuan an state-a ranvulha eizawngtute chu, b awnghnute-a intodelh thei tura 'milk revolution' kalpui turin a ngen a, an state mai ni lo, South East Asian ram hrang hrangah te thawn chhuak thei turin sorkar chuan ruahmanna a siam a ni, a ti.

West Assam Milk Producers’ Cooperative Union Limited (WAMUL) buatsaihin Thawh-
ṭanni khan Srimanta Sankaradeva International Auditorium, Guwahati-ah 'Purabi Milk Day' lawmna hun neih a ni a, he hun hi chief minister chuan a hmanpui. Sonowal chuan bawng vulha eizawngte chu nasa zawka ṭan la tura fuihin, "Gujarat-a awm Amul ten India ram mai ni lo khawvel hmun danga thawnchhuah tur an thar chhuak thei hi an fakawm hle a ni, hetiang hi kan ti ve thei tur a ni" a ti. Kal khawmte hmaah CM chuan, State sorkar chuan farmer-te hmalakna te chu a thlawp tlat tih sawiin, harsatna an neihte sorkarah thlen hreh lo turin a ngen. Assam chuan dairy sector-ah hmasawn turin theihna a nei a, a ram leilung pawhin a zir a, hei hi chhawr ṭangkaia India ram mai ni lo South-East Asian ram thlenga thawn chhuak thei tura ṭan lak a ngai a ni, a ti. Gujarat-a hmunpui nei Amul chuan chhiah vaibelchhe 25,000 zet sorkar-ah a chhung thei a, farmer-te pawhin kum khatah vaibelchhe 18,000 an thawk chhuak thei a ni, a ti bawk.

Sonowal chuan kum riat kalta khan WAMUL te chuan ni khatah bawnghnute litre 500 chauh an thar chhuak a, tunah chuan litre 50,000 nitin an thar chhuak tawh a ni tiin, kum 2017-ah chuan ni khatah litre nuai nga thar chhuak thei turin hma lak a ni ang, a ti. Dairy sector-ah chak zawka hmasawnna kalpui a nih theih nan, thingtlang khua 25,000-ah Chief Minister’s Samagra Gramin Unnayan Yojana hmangin vaibelchhe 1.20 ṭheuh invest turin sorkar chuan ruahmanna a siam mek a ni, a ti.

Prime Minister Narendra Modi pawhin hmarchhak chu 'organic hub'-a siam tura hmalak a nih tur thu a puang niin Sonowal chuan a sawi.