AYA-te'n Ziro-a ALG-ah Civilian Terminal din phut

Arunachal Pradesh-a Apatani Youth Association (AYA) chuan thuchhuah siamin, Arunachal Pradesh sorkar chu Ziro Advance Landing Ground (ALG)-ah Civilian Terminal din a nih theih nana Union ministry of Defense leh Union ministry of Civil Aviation-ah te rawtna thlen turin an phut tih an tarlang.

AYA president Taku Chatung chuan, "ALG, Ziro-ah hian civilian terminal din ngei kan phut a, ram awl acre 38-a zau a hmun tur a awm a ni" a ti. Chatung chuan civilian terminal lian tak an phut kher lo tih sawiin, basic terminal seat 25 awm theihna aircraft chu mipuiten an duh leh mamawh niin a sawi. Terminal din a nih theih nana rawtna chu Eastern Command, Shillong air vice marshal chuan December 21, 2015 khan a pawm tawh tih sawiin, January 4, 2016-a Airforce headquarter, New Delhi-a Apex Committee meeting-ah pawh sawiho niin, pawmpui an nih tawh niin a sawi.

Hetih lai hian Ziro DC-in March 12, 2016-a AGL a hawn hnu khan terminal din a nih theih nan hian rawtna
ṭum hnih a thlen tawh a, mahse Union ministry of Defense chuan a hnawl a, ALG aṭanga meter 900 aia hnaiah thing phun leh eng thil dang mah din phal a ni lo nia tarlan a ni. Apatani Youth Association (AYA) te hian an thil phut a hlawhtling lo a nih chuan Ziro-a Advance Landing Ground (ALG) chu an pawm thei dawn lo niin an sawi bawk.