Meghalaya BJP-te'n Sorkar laipui an dawr dawn

Meghalaya state Bharatiya Janata Party (BJP) chuan April, 2014 aṭanga National Green Tribunal (NGT) ten an state-a lungalhthei laih chhuah leh phurh chhuah kawnga khuakhirhna a siamsak chungchangah sorkar laipui dawr turin New Delhi-ah palai an tir dawn tih an sawi.

BJP state president Shibun Lyngdoh chuan an harsatna tawh mek chu Union Coal Minister Piyush Goyal leh Forest and Environment Minister Anil Madhav Dave te sawipui an tum thu sawiin, hma lak puiah an sawm tur thu a sawi. Shibun chuan Union Coal ministry chu NGT-te'n an state-ah khuahkhirhna dan a hman mek avanga harsatna an tawhte chingfel tura hma la tura an phut thu a sawi bawk. July 21 khan NGT chuan Meghalaya-a lungalhthei khur neitute chu mining kalpui zel dan tura an ngaihdan leh an duhdante thlen turin a lo hriattir tawh.

BJP official chuan New Delhi-a an cham chhung hian Union Agriculture Minister Radha Mohan Singh dawr an tum bawk a, Shillong-a Central Agriculture Uni-versity din tur chung-chang an sawipui dawn tih a tarlang. Agriculture University dinna tur lungphum chu phum a ni tawh a, tender pawh chhuah tawh a ni. Union Minister of Road Transport and Highways Nitin Gadkari chu Ri-Bhoi district-a Jagiroad, Assam - Umsning chungchangah dawr an tum bawk.