NE inkalpawhna kawngpui atan vbc nuai khat ruahman

Union Minister for Road Transport and Highways Ni­tin Gadkari chuan kum nga chhunga hmarchhak bial in­kalpawhna kawngpui tih­changtlun nan sorkar laipuiin cheng vaibelchhe nuai khat a ruahman thu a sawi.

Ministry of Road Transport and Highways chuan Thawh­lehni khan Guwahati-ah 'Key Challenges in Highways and Infrastructure Construction in the North Eastern Region and Use of Innovative Tech­nologies and Materials’ thupuia hmangin workshop a buatsaih a, Union Minister Gadkari chuan workshop hawnnaah he thu hi a sawi.

Workshop-ah hian hmar­chhak biala kawngpui tih­changtlun tuma hmalaknaah a mawhphurtu, state sorkar, sorkar officer, contractor leh skilled labour te tana buatsaih a ni a, kawngpui tihchangtlun kawnga thawhho dan leh mawhphurhna chungchang sawiho a ni.

Sorkar laipuiin kawngpui tihchangtlunna atana hmar­chhak biala project lian a kalpui mekah Gadkari chuan state sorkar thawhpuina a ngen nghal a, kawngpui ṭha chu kawng engkima hmarchhak bial hmasawnna tur a ni, a ti.

Workshop-ah hian Megha­laya Chief Minister Mukul Sangma, Union Minister Sarbananda Sonowal leh Kiren Rijiju bakah Assam leh Tripura PWD Minister te an tel a, Assam Chief Minister Tarun Gogoi chu tel tura beisei ni mah se a tel lo.

Union Sport Minister Sar­bananda Sonowal chuan hmar­chhak inkalpawhna kawng­pui tihchangtlun kawng­ah sorkar laipuiin mitin ṭawi­awmna a mamawh thu sawiin, workshop chu mithiam te, contractor leh skilled labour te'n Ministry of Road Transport thuneitute hnena an ngaihdan thlenna rem­chang atana buat­saih a ni, a ti.

Sonowal chuan hmarchhak biala hmasawnna project lian kalpuina kawngah sorkar laipui chuan state sorkar chu thawhpuiah a duh thu sawiin, sorkar laipui project te chu state tinte'n an ngaihvenpui loh chuan a hlawhtling thei lo a ni, a ti.

Kawngpui sialna atan state sorkarin ram a ngaihtuah a ngai a, sorkar laipui a thawhpuinaa boruak nuam tak a siam a ṭul a ni, a ti a, lawng hmanga tui lama inkalpawhna chu a man a tlawm avangin sorkar laipuiin a tihchangtlun dan ngaihtuah a tum thu a sawi bawk.