Report thehlut turin Centre-in Assam leh WB hriattir
Sorkar laipui chuan thingpui huana hnathawkte thla hlawh bithliah chungchangah report thehlut turin Assam leh West Bengal sorkar a hriattir.
Union Minister of State (Independent) for Labour and Employment Bandaru Dattatreya chuan he thu hi sawiin, "Thingpui huana hnathawkte thla hlawh bithliahsak zat chu a tlem bakah an dinhmun a chhe hle a, hemi kawngah hian Assam leh West Bengal aṭangin complaint kan dawng nasa hle. Thingpui huan leh a hnathawkte hamṭhatna chu Ministry of Commerce-in a buaipui ṭhin a, mahse an thla hlawh bithliah erawh state sorkar mawhphurhna a ni," a ti. Mahse state sorkar te'n hna thawkte hnenah minimum wage angin hlawh a pe em tih erawh enfiah an tum thu a sawi bawk.
Union Minister Dattatreya hian North Eastern region Labour Ministers Conference-a tel tumin Guwahati a tlawh a ni.
NDA sorkar chuan hmarchhak bial a ngaihpawimawh thu sawiin, Beltola-a khum 50 awmna Employees' State Insurance Corporation (ESIC) Hospital chu khum 100 awm theihna atan zauh a nih tur thu leh hna pawh thawh ṭan thuai a nih tur thu a sawi.
"State dang aṭang pawha hetianga hospital zauh emaw rawtna dang a lut a nih chuan sorkar laipuiin a ngaihtuah zel ang," a ti.
Hmarchhak state dangah pawh Union Labour and Employment Ministry hnuaia ESIC hospital service chu pek an tum thu Dattatreya chuan a sawi bawk a, Employees' Provident Fund Organisation (EPFO) office hawn nan sorkar laipui chuan Gangtok, Imphal, Aizawl, Dimapur leh Itanagar-ah sq. feet 1,000-a zau ṭheuh ram a zawn thu a sawi bawk.
Guwahati-ah vocational training centre hawn a nih tur thu a sawi bawk a, Labour chu state leh sorkar laipui thuneihna hnuai, concurrent list-a awm a nih avangin sorkar laipui leh state sorkar chu team khat anga an thawhho theih tur thu a sawi.
India rampumah Union Labour and Employment Ministry chuan ṭhalai hna nei lote tan kum hnih chhungin hnaruak vaibelchhe khat siam a tum thu a sawi bawk.
Union Labour and Employment Minister Dattatreya chuan India work force zinga 93% chu unorganised sector-ah an awm thu sawiin, Unorganized Workers Card (UWIN) hmangin heng hnathawkte hi social security schemes siamsak an tum thu a sawi.
Central labour law 44 te chu siamṭhat an tum thu leh awmze nei zawka, code pali- wage, social security and welfare, safety and working environment leh industrial relation-a chhunkhawm an tum thu a sawi bawk.
Union cabinet pawhin Child Labour (Prohibition and Regulation) Act chu awmze nei zawka siamṭhat a remtih thu a sawi bawk a, rampuma employment exchange zawng zawng chu career counseling centre-a siam an tum thu a sawi bawk.