Assam-in ram a luahsak vangin AP lungawi lo

Assam Forest Department te'n Arunachal Pradesh, Papum Pare district-a Rashaso-ah beat office an sak avangin Arunachal mipui an lungawi lo hle.

Papum Pare Deputy Commissioner (DC) Tai Kaye chuan tun hnai khan Rashaso-a Assam mite beat office sak hi a hmuna en an tum thu leh, Assam Police-in an lo dan thu a sawi a, Assam Sonitpur district-a Di­vi­sional Forest Officer (DFO) chu beat office saktirtu a nih thu leh Assam police leh Assam Reserve Battalion te venhimna hnuaiah hna an thawh thu a sawi bawk.

Kaye chuan Assam lamin beat office an sakna chu chiang takin Papum Pare district huam chhung a ni, a ti.

DC Kaye chuan beat office sak chu Arunachal sorkarin a dodal thu Sonitpur district DFO a hrilh bakah state pahnihte inlaichinna khawih pawi thei thil a nih avang leh ramri thubuai chinfel a nih hma chuan hna thawh chawlhsan rih turin a ngen bawk.

Deputy Commissioner chuan Papum Pare district mipuite chu mahni kuta dan lekkawh lo turin boruak tichhe zawnga hma la lo turin a ngen.

Hetihlai hian All Nyishi Students’ Union (ANSU) pawhin Rashaso-a beat office sak mek chu chawlhsan turin Assam sorkar a ngen bawk.

ANSU chuan Assam police te chu ramri chhehvela mipuite vau a, tihduhdah ṭhinah a puh bawk a, Assam Forest Department chu ram inchuh thubuai chinfel a nih chuan ramri chhehvelah hmalakna nei rih lo turin a ngen bawk. State pahnihte ramri chinfel nan ANSU chuan sorkar laipui inrawlh tura ngen turin state sorkar a ngen bawk.