Zu khapna dan hlih a hun: CM Ibobi

Manipur Chief Minis­ter O Ibobi Singh chuan state chhunga zu khapna dan an lekkawh chu sor­kar sum hnar siamna atan hlih ṭul a tih thu a sawi.

Liquor Prohibition Act, 1991 tlawhchhanin Ma­nipur-ah hian zu khap a ni.

Manipur Legislative Assembly budget session neih mekah Chief Minister Ibobi chuan Thawhlehni khan he thu hi a sawi a, sum an neih loh avangin Manipur sorkarin Food Security Act chu a kalpui theih loh thu leh sum tam tham tak an mamawh thu a sawi.

Finance portfolio changtu Ibobi chuan Excise Regulation Act chu ennawn a ṭul tak zet tih sawiin, Manipur leh Nagaland chauh chu hmarchhak biala zu zawrh khapna an la nih thu a sawi bawk.

Ibobi Singh chuan excise duty aṭanga an sum hmuhte chu Food Security Act kalpuina atana an hman theih tur thu leh state dangte pawhin an hman thu a sawi bawk a, excise duty aṭanga state sorkar revenue tihpun loh chuan state sorkarin mipuite hamṭhat nan hna a thawk tam thei lo a ni, a ti.

Art and Culture portfolio chelh kawptu, CM Ibobi chuan University of Culture hawn an tum thu a sawi a, state Governor pawhin a pawmpui tawh thu a sawi bawk. University of Culture hi academic session thar aṭanga kalpui ṭan an tum thu leh state cultural policy pawh duan an tum thu a sawi bawk.