Insawifiah turin HC-in IT deptt hriattir

Income Tax department-in Shillong municipal huam chhunga tribal te hnen aṭanga income tax a lak loh avangin Meghalaya High Court chuan insawifiah turin a hriattir.

Chief Justice Uma Nath Singh leh Justice SR Sen te awmna bench chuan June 16 khan hemi chungchangah hian hearing a ko tawh a, hemi ṭum hian Income Tax department chu kar thum chhunga insawifiahna thehlut turin a hriattir.

Meghalaya HC thuchhuak chuan Shillong municipal area-a cheng tribal te chu mi hausa tak tak an nih thu leh Meghalaya sum hnar 90% chuang khuahkhirhtu leh central fund hrang hranga a hamṭhatna dawngtu an ni, a ti a. hei vang hian income tax an pek loh chhan a hriat duh thu a tarlang.

Hetihlai hian Khasi Hills Au­­­­to­­nomous District Council (KHADC) session neih mekah Shella MDC Teinwell Dkhar-a'n Zero Hour-a income tax chung­chang sawiho tura a ngenna chu Deputy Chairman Gabriel Wah­lang chuan a hnawl.

KHADC deputy chairman Wahlang chuan HC-in Income Tax department a hriattirna chu court thuneihna hnuaia ngaihtuah tur a ni, tiin a MDC Dkhar-a ngen­na a hnawlsak a ni. Hetihlai hian eptu hruaitu Metbah Lyngdoh chuan income tax chungchangah court-in thutlukna a siam tawh avangin court ngaihtuah tur chauh a ni lo tiin KHADC session-a sawiho a phut thu a sawi.

"House conduct of business rules chuan thil pawimawh sawi­ho ngai chu sawi lan a phal a, hei vang hian member te'n kan sawi­ho a rem a ni," tiin eptu hruai­tu Lyngdoh chuan a sawi.