Congress-in M'laya by-election-ah hnehna chang

Meghalaya-a rorellai Congress party chuan Chokpot assembly con­stituency-a by-election-ah hnehna a chang.

Chokpot bialtu Garo National Council (GNC) MLA Clifford R. Marak-a boral avangin by-election neih a ni.

Congress party can­didate Bluebell Sangma chuan amah hnaih bertu, National People’s Party (NPP) candidate Phillipole D. Marak chu vote 2,550-in a hneh. Bluebell Sangma hian a pumpuiah vote 8,042 a hmu a, Phillipole hian vote 5,492 a hmu thung.

Congress candidate Bluebell hi NPP member hlui a ni a, by-election neih tur puan a nih hma lawkin Congress party a zawm. GNC MLA thi ta, Clifford R. Marak-a nupui Kalpana D. Sang­ma pawhin GNC aiawhin inthlan a chuh a, vote 5,009 hmuin, pathum­na dinhmun a hauh.

Independent can­didate Tinkerwin R. Marak-a'n vote 1,189 a hmu bawk a, hetihlai hian voter 424 chuan “None of the Above”-ahvote an thlak thung.

Chokpot by-election hi June 27 khan neih a ni a, Thawhlehni khan result puan a ni.

Congress general se­cretary (Northeast) V. Narayanasamy chuan an party-in hnehna an chang chu Meghalaya mipuite'n Congress party-a rinna an la neih tam zia lantirtu a ni, a ti.

Member 60 awmna Assembly-ah Congress hian member 30 a nei ta a, party mala sorkar siam turin member pakhat an la mamawh a ni. Mahse Congress hi NCP MLA pahnih, North-east De­mo­cratic Socialist Party MLA pakhat leh independent MLA 11-in a thlawp.

Eptu ṭangrual, Megha­laya People`s Front-ah Uni­ted Democratic Party MLA pariat, National Peo­ple`s Party MLA pahnih leh independent MLA pa­hnih an awm. MLA pali neitu Hill State People’s Democratic Party erawh ep­tu ṭang­rual-ah hian a tel lo.