Sonowal-a'n ULFA(I) te Kuldip chhuah turin ngen

Assam Chief Minister Sarbananda Sonowal chuan United Liberation Front of Assam {ULFA (I)} ten August 1-a an kidnap Kuldip Moran chu chhuah turin a ngen.

ULFA(I) leader Arunodoy Axom chuan Thawhlehni khan Kuldip Moran-a unaupa chu phone-a biain, Kuldip tlan nana an sum phut vaibelchhe khat chu cheng nuai 80-ah an tihhniam thu a hrilh. ULFA (I) te chuan Kuldip chu tlanna sum tel lo chuan an chhuah dawn lo tih a sawi nawn leh bawk. Kuldip-a pa Ratnaswer Moran hi Tinsukia zila parishad vice-president a ni a. Kuldip hi a rubotute hian Indo-Myanmar border-a Search Results National Socialist Council of Nagaland (NSCN) rest camp-ah an hreng nia tarlan a ni.

Assam police chuan hnuchhui kawngah Arunachal Pradesh puihna a dil a, Kuldip chu him taka chanchhuah an tum thu an sawi. Director General of Police (DGP) Mukesh Sahay chuan hemi chungchangah hian Nakhung police station-ah thubuai ziah luh a nih thu sawiin, Kuldip chhanchhuah a nih theih nan security forces leh intelligence agency-te rawih an nih thu a tarlang. Changlang district SP Amit Sharma leh Tinsukia district SP Mugdhajyoti Mahanta te pawhin Changlag district-a ram ngawte chu fimkhur thu hlaah dap a nih thu an sawi ve bawk.