Tripura-ah Tribal-te'n buaina chawk chhuak

Thawhlehni khan Tripura-ah ‘Tipraland’ Statehood Demand Day lawmin Indigenous People's Front of Tripura (IPFT) ten kawng an zawh a, tharum thawhna thlen zuiin Agartala-a civil mi leh sumdawngte an bei a, mi 100 dawnin hliam an tuar.

Buaina chhuah chhan chiang tak hriat ni lo mah se, tribal ni lo hmeichhe nufate chuan kawngzawhtuten kawng an zawh lai hian kawngpui kan an tum a, IPFT te hian an lo bei zui mai nia tarlan a ni. Hemi hnu hian kawngzawhtute hi che zuiin, kawng sira dawr leh lirtheite chu an suasam zui ta a ni. IPFT leader Rajeswar Debbarma chuan hliam tuar zingah hian an mi leh sa 50 vel an tel thu sawiin, hospital panpui nghal an ni, a ti.

Tribal-te hian kum 1984- 2008 chhung khan kum tin August 23 chu Autonomous District Council (ADC) formation day atan an hmang ṭhin a, mahse kum 2009 aṭang khan IPFT te chuan he ni hi 'separate statehood demand day' atan an hmang ta zawk a ni.

Tripura Police-te chuan tharum thawhna thlentute hi Indigenous People's Front of Tripura (IPFT) an nih thu sawiin, kawng zawh an hauihawt a, kawnga mihring leh lirthei bakah an hmuh remchan apiang an khawih mai niin an sawi. IPFT-te hian Chowmuhai-ah dawr ṭhahnem tak an suasam a, lirthei eng emaw zat an hal bawk. He thil thleng vang hian hriat theih chinah hliam mi 100 vel an awm tawh a, hospital panpui nghal an ni tih SP (Police Control), Uttam Bhaumick chuan a sawi.

Pawikhawihna thlenna hmun hi DGP K Nagraj leh SP Abhijit Saptarshi te chuan an pan nghal a, police leh paramilitary force
ṭhahnem tak chuan venhimna khauh zawkin an kalpui nghal a ni. IPFT-te hian state hran pek an ngiat a, Tripura Tribal Areas Autonomous District Council (TTAADC) chu state puitlinga hlankai an phut a ni. Rorellai Communist Party of India (Marxist) {CPI(M)} chuan tharum thawhna thleng chu an dem takzet tih an sawi a, IPFT-te hian state chhungah buaina chawhchhuah a, inlak hran an tum a ni, a ti.

Agartala-ah hian dan leh thupek khauh zawka kenkawh a nih theih nan Section 144 puan a ni. Tharum thawhna thlenga hliam tuar zingah hian venhim hna thawktu police eng emaw zat an tel a ni. Tripur-ah hian mi maktaduai li vel an cheng a, hmun thuma
ṭhen hmun khat vel chu tribal niin, ram hmun thuma ṭhena hmun hnih vel an luah a ni.

Hetih lai hian eptu party, BJP thupuangtu Mrinal Kanti Deb chuan, Tripura Tribal Areas Autonomous District Council hnuaia Simna-Tamakari by-election neih hun leh 'separate statehood demand day' inrual hian rorel lai sorkar chak tawk lo zia a tilang chiang hle niin a sawi.