Sharmila court-ah a inlan

Manipur civil activist Irom Sharmila Chanu-i chuan Armed Forces (Special Powers) Act (AFSPA) hlih a nih theih nan campaing a kalpui chu chawlh san mai a la tum lo tih sawiin, India ram mai nilo khawvel huapa kalpui a tum thu a puang.

Thawhlehni khan "Manipur Iron Lady" hi Section 309 of IPC tlawh-chhanin, chaw nghei a kalpui laia mahni intihhlum tuma puhna thubuai kal zelah L. Tonsing, chief judicial magistrate (Imphal West) hmaah a inlan a, September 5-ah inlan leh tura tih a ni. Sharmila (44) hian kum 16 chhung AFSPA hlih phuta chaw nghei a kalpui hnuah August 9 2016 khan chaw nghei a titawp a, Jawaharlal Nehru Institute of Medical Sciences (JNIMS), Imphal East-ah enkawl a la ni a, doctor-te thurawn angin chaw tuiril lam chiah a la ei a ni. Northeast Forum for International Solidarity-te chuan New Delhi-ah 'mass campaign against AFSPA' buatsaihin, he hunah hian Sharmila an thlawpna leh AFSPA dodalna thuziakte an lo tarlang tawh a ni.

Irom Sharmila-i hian court aṭanga a chhuah hnu hian thuthar thehdarhtute hmaah thu sawiin, "Kum tam tak harsa taka ka beihna chuan hlawhtlinna a la thlen loh avangin ka bei chhunzawm zel dawn a ni. India ram mai ni lo khawvel hmun dangah pawh min thlawp tlattu mi tam tak an awm a ni" a ti. "Zau zawka campaign kalpui turin ka inbuatsaih a, ka chawlhsan mai dawn lo a, ka kalpui dan ka thlak mai zawk dawn a ni" a ti bawk.

Sharmila-i hian chaw nghei chawlhsan tawh mah se AFSPA chu a do zel dawn tih a sawi nawn leh a, a lo intiam tawh ang ngeiin a thil tum a hlawhtlin hma loh chuan an chenna inah kir leh a tum loh thu a sawi. A nu kum upa tawk nen pawh kum tam tak an inhmu tawh lo a, Sharmila-i'n chaw nghei a tihtawp thu a puan khan mi tam tak an pungkhawm a, mahse hemi ṭum pawh hian a nu chu a fanu hmu tur hian pawn a chhuak thei tawh lo a ni. Red Crosss Manipur chuan Sharmila-i hi hospital
aṭanga a chhuah hnua a chen lailawkna tur chu Im-phal-ah an ngaihtuah sak a ni.