Meghalaya-ah JACATAM-te nawrh vawngin school khar

Meghalaya-a Joint Action Committee of All Teachers Associations of Meghalaya (JACATAM) te'n sorkar nawr nana nawrh an kalpui mek avangin school eng emaw zat khar a ni.

JACATAM-te chuan state sorkarin zirtirtu 14,000 te dahnghehna tur hun rei tak chhung a tihkhawtlai sak avangin ni 14 chhung lungawi lohna lan tir an tum thu hi an lo sawi tawh a, Thawh-
ṭanni aṭang khan an kalpui ṭan ta a ni. Hemi chungchangah hian Joint Action Committee of All Teachers’ Associations of Meghalaya (JACATAM) hmalaknain Khasi, Jaintia leh Garo Hills huam chhunga zirtirtute chu Iewrynghep ground-ah an lo pungkhawm tawh bawk. Lungawilohna hi August 22 khan ṭan a ni a, September 4 thleng kalpui a ni ang.

State khawpui Shillong-ah chuan school zawng zawng deuh thaw khar a ni a, school ṭhenkhat chu hawn ni ve mah se naupang school kal an awm mumal loh avangin zirlai kalpui a ni lo. JACATAM chairman E D Nongsiang chuan, "State sorkarin hun rei tak chhung kan thil phût a tikhawtlai hi pawi kan ti a, sorkar kar nana hma kan lak ve mai a ngai ta a ni" a ti. JACATAM te hian state sorkar hnuaia zirtirtu kum thum aia rei service tawh mi 14,000 te dahngheh an phût a, an zingah hian government aided, ad hoc leh deficit school-a zirtirtu mi 4,500 an tel.

JACATAM chairman chuan state chhunga zirtirtute chuan an hmalakna chu an thlawp
ṭha hle tih sawiin, school kal lui hmuh tur an awm meuh lo tih a sawi. Nongsiang chuan an hmalakna avanga harsatna awm theiah mipuite hriatthiamna an ngen tih sawiin, a bikin zirlai nu leh pate hriatthiamna an ngen tih a sawi. An harsatna chingfel turin state sorkar chu inbiakna neihpui an duh tih a sawi a, an thil phut sorkarin a tihhlawhtling mai lo a nih chuan September 5-a meeting an neih turah hmalak zel dan tur an rel dawn tih a sawi bawk.

Hetih lai hian Deputy Chief Minister in-charge Education RC Laloo chuan JACATAM te thil phût chu tihhlawhtlin nghal mai theih a nih loh thu sawiin, school managing committee-ah thlen phawt ngai niin a lo sawi tawh a ni.