Assam sorkar leh Dredging Corporation of India Ltd-te'n inremna an siam

Assam sorkar chuan kum tina tuilian avanga an harsatna tawh ṭhin sutkianna kawng khat atan Brahamputra lui mawng thuk zawka laih hna thawk turin Dredging Corporation of India Ltd chu inremna a siampui.

Hmalakna hmasa atan public sector undertaking team-te chuan Brahmaputra lui zirchiang turin Assam an pan ang.

Chief Minister Sarbananda Sonowal chuan tuilian avanga harsatna nasa tak an tawh ṭhin sukiang tura hmalakna chu thlawp turin mipuite a ngen a, state sorkar chuan Dredging Corporation of India Limited hmalakna a thlawp tlat dawn tih a sawi. He hmalakna hi tuilian venna tur a nih bakah, leilung luangral chak lutuk tur venna kawng khat a nih thu a sawi bawk. Brahmaputra hi Assam mipuiten eizawnna leh kawng hrang hranga an chhawr ṭangkai ber te zinga mi a ni.

Kum tinin Assam hian tuilian nasa tak a tuar ṭhin a, mi tam takin nunna an chan bakah in leh lo ṭhahnem tak a len chhe ziah a ni. Tun hnai khan state sorkar chuan World Bank aṭanga sum pukin, tuilian danna siam turin hma a la mek bawk. Kumin bika Assam-in tuilian a tawrh hi tun hnai kum 10 chhunga a nasat ber ṭum niin an sawi a, mi nuai telin harsatna an tawk a ni. Brahmaputra lui kianga awm Kaziranga National Park ram 80% vel zet chu tuiin a chim hman a ni. Ramsa thi an ṭhahnem hle a, thi mai tur eng emaw zat chhanchhuah an ni bawk. Tuilian tuar nasa zingah hian huan neitute telin, an thlai chinna ram zau tak chu tuiin a chim avangin harsatna lian tak an tawk mek a ni. Kumin bikah hian tuilian avanga nunna chan chu mi 30 vel an tling tawh.

Hetih lai hian Nilaini khan National Green Tribunal (NGT) chuan Numaligarh Refinery Limited (NRL) chu Assam forest department hnenah zángnadawmna cheng nuai 25 pe turin a hriattir. NRL hian park hungna boundary wall leh barbed wire-te an hnathawhnaah an tihchhiatsak nia tarlan a ni a, park chhunga sai eng emaw zat an chhuah bakah thing eng emaw zat an tichhia a ni. Hemi chungchangah hian New Delhi-a environmental law firm-a Legal Initiative for Forest and Environment researcher chuan Rohit Choudhury chuan zángnadawmna pe tur hian thubuai a ziak lut a ni. NRL hian forest acts 'Forest Conservation Act, 1980' a bawhchhia nia tarlan a ni.

Tribunal-in zángnadawmna cheng nuai 25 pe tura a a hriattirna hi NRL lam chuan tribunal website-a tarlan a nih hnuah an hre ve chauh niiin NRL public relations officer M. Handique chuan a sawi.