Agartala-ah punkhawm leh kawngzawh khap

Tripura sorkar chuan an state khawpui Agartala-a tribal-te tharum thawhna thleng avangin fimkhur thilah mipui punkhawm leh kawngzawh khapna thupek lailawk a chhuah.

Nilaini-a Indigenous People’s Front of Tripura (IPFT) te ‘Tip-raland’ Statehood Demand Day' lawmna kawngzawhah khan mi 3,000 vel an tel a, buaina chhuak zuiin mi eng emaw zatin hliam na tak an tawrh bakah lirthei 15 vel hal a ni. He thil thleng avang hian Agartala-ah hian Section 144 of the CrPC hman nghal a ni a, punkhawm leh kawngzawh khap lailawk a ni. Police thupuangtu Uttam Bhowmik chuan police, paramilitary forces leh Tripura State Rifles te chuan venhimhna an thawk nghal a, Agartala leh a chhehvelah boruak a pangngai leh viau tawh niin a sawi.

State chhunga police station 74 te chu a ṭul huna che chhuak thei tura hriattir an ni a, a hmunah duty eng emaw zat an awm. IPFT-te hian state hran pek an phut a, Tripura Tribal Areas Autonomous District Council aṭanga indan an duh a ni. Rorel lai Communist Party of India-Marxist (CPI-M) chuan pawikhawihna thlen chhanah Trinamool Congress (TMC) an puh a, boruak tichhetu an ni a ti. Hetih lai hian eptu lam chuan sorkar rorel fel lo zia lanna niin an sawi ve bawk.