Sharmila-i'n thubuai titawp turin court ngen

Manipur 'Iron Lady' Irom Chanu Sharmila-i chuan mahni intihhlum tum thubuai a awrh mek chu tihtawp sak turin Chief Judicial Magistrate, Imphal West a ngen.

Sharmila chuan chaw nghei titawpin nun pangngaia nung turin bul a ṭan leh tawh tih sawiin, court chu a lakah zahngai turin a ngen. Sharmila-i hian an state-a Armed Forces Special Powers Act hman mek hlih a nih theih nan kum 2000 aṭang khan chaw nghei a kalpui a, hei vang hian a lakah mahni intihhlum tum thubuai siak sak a ni. A thubuai neih vang hian court-ah vawi tam tak a inlan tawh a, tunkar Thawhlehni pawh khan Chief Judicial Magistrate, Imphal West hmaah a inlan leh a ni.

Cheirap Court complex-a thuthar thehdarh­tute a kawmnaah Sharmila-i chuan, "Thil tihdik loh leh tihsual ka nei lo a, dan ka bawhchhe hek lo" tiin, mahni intihhlum a tum loh zia a sawi. Hetih lai hian Sharmila-i hi September 5-ah court-ah inlan leh tura tih a ni. Cheirap Court complex hi Jawaharlal Nehru Institute of Medical Sciences (JNIMS) ambulance hmangin panpui a ni a, Imphal West district police te chuan an veng a ni.