Amnesty-in thla ruk danah AFSPA ennawn phut

Amnesty International chuan Armed Forces Special Powers Act (AFSPA) tlawhchhana 'disturbed area' puan chu thla ruk dana ennawn a duh thu a tarlang.

Amesty chuan tun hnai khan ‘Denied: Failures in ac­coun­­tability for human rights violations by security force per­son­nel in Jammu and Kashmir’ report a tichuak a, kum 2005 khan Supreme Court chuan judge hlui Justice BP Jeevan Reddy-a kaihhruaina hnuaiah AFSPA zirchianna neih a nih tawh thu a tarlang. Hemi ṭum hian Justice Reddy committee hian Manipur khawpui, Imphal-a Thangjam Manorama Devi pawngsual a nih hnua thah a nih dan a zirchiang a, security force te chu pawikhawihtua puh an ni. Committee chuan report a thehluhah "dan chu mi hnuaichhiah nan leh nekchepna hmanruaa hman a ni a, inhuatna leh tihduhdah chhinchhiahna a ni" tiin a tarlang.

Chief Justice of India hlui JS Verma kaihhruaina hnuaiah sorkar laipui kum 2012 khan pawngsual thubuai kaihhnawiha dan awmte zirchiang tur a din leh a, hemi ṭum hian committee chuan Armed force emaw security personnel te'n pawngsual thubuai an nei a nih chuan sipai dan tlawhchhana thubuai relsak loin criminal law pangngaia an thubuai relsak a rawt a ni. Committee chuan security force te'n hmeichhe chunga hleilenna emaw pawngsual thubuai an neiha criminal law pangngaia an thubuai relsak a nih theih nan AFSPA chu siamṭhat (amend) a rawt bawk.

Hetihlai hian sorkar laipui chuan hmeichhiate chunga hleilenna thubuai kaihhnawihah kum 2013, April khan dan thar a siam a, pawikhawihnaa sorkar official inhnamhnawihte hremna thlengin siam mah se security force hmeichhe chunga hleilenna emaw pawngsual thubuai neite hremna atana AFSPA siamṭhat rawtna erawh tun thlenga bawhzui a ni lo.

Kum 1978 leh 2010 inkara Manipur-a security force te kuta mi 1,528 thihna thubuai kaihhnawiha public interest litigation (PIL) an thehluh chhui chiang turin kum 2013, January khan Supreme Court chuan Supreme Court judge hlui Justice N Santosh Hegde-a kaihhruaina hnuaiah committee a din leh a ni. Committee hian thubuai 1,528 aṭangin thubuai paruk thlang chhuakin a zirchiang ang a, security force te hian anmahni invenna atana kaphlum nge an nih hel an beihnaa rinhlelh thilah an kaphlum palh tih a chhui chiang bawk ang. Manipur-a security force te hnathawh dan kalphung a enfiah bawk ang.