Gadkari-a'n Tripura tan NH thar a puang

Union Road Transport, Highways and Shipping Minister Nitin Gadkari chuan Nilaini khan Tripura aṭanga Assam kalpawhna tur National Highway (NH) pahnih siam a nih tur thu a sawi.

"State sorkar chuan hun rei tak kalta aṭang khan NH thar pahnih siam a ngen tawh a, pakhat chu Sabroom aṭanga Assam, Kukital thleng leh pakhat chu Khowai sub-division aṭanga Agartala thleng siam a rawt a ni," tiin a sawi.

National Highway thar hi sorkar laipui­in ramchhunga kilometre 5000-a thui kawngpui sial a tum, Bharatmala hnuaiah siam a nih tur thu Gadkari chuan a sawi a, kumin December-a hnathawh ṭan theih a beisei thu leh cheng vaibelchhe 801.79 ruahman a nih thu a sawi.

Union Road Minister Gadkari hian Nilaini khan Agartala aṭanga Gomati district Udaipur panna kawngpui dou­ble lane-a siamna tur lung a phum a, South Tripura district Jolaibaria aṭangin Bangladesh ramri panna kawngpui kilometre 30-a thui pawh sial a nih tur thu a sawi. Assam leh Agartala inkalpawhna National Highway-a Churaibari leh Sabroom inkar double lane-a siam hna pawh thawh zawh ṭep a ni, a ti.

Gadkari chuan India, Bangladesh, Nepal leh Bhutan inkalpawhna kawngpui siamna atan tun hnai khan Thimpu-ah thuthlung ziah a ni tih a sawi bawk a, Maynamar kaltlanga India aṭanga Thailand kalpawhna kawngpui sial an tum thu a sawi bawk.

Lawng hmanga inkalpawhna pawh tihchangtlun an tum sawiin, India rama lui 101-ah lawng hmanga inkalpawhna siam an tum thu a sawi.

Union Minister chuan hmarchhak biala inkalpawhna kawngpui sialnaah sorkar laipuiin tualchhung contractor, engineer leh stake holder te chu tam zawka chhawr a duh thu a hmain Guwahati-ah a lo sawi tawh a, kawngpui project thawhnaa contract te chu tualchhung contractor tê zawkte'n an thawh ve theih nan package tê zawka phel darh an tum thu a sawi bawk.