Lokayukta-in Nagaland Dy CM laka Complaint thehluh a hnawl

Nagaland Lokayukka Justice Uma Nath Singh chuan zirlai pawl hruaitu hluiin deputy chief minister Y Patton chu Nagaland Public Service Commission (NPSC)  examination result siamah a thuneihna dik lo taka hmanga puh a, complaint a thehluh chu a hnawlsak. 

Justice Singh chuan Patton an puhna hi finfiahna ṭha tak a awm lo tih sawiin, Lokayukta ngaihtuah chhunzawm tlaka ngaih a nih loh thu a sawi. " Complaint hi  hmanhmawh takin, finfiahna mumal awm loin thehluh a ni. Lokayukta hi hetiang thil finfiahna leh ṭan chhan mumal nei loah a inrawlh dawn lo a, hei vang hian complaint thehluh pawh hi hnawl a ni," a ti. 

Deputy CM laka complaint thehluttu hi zirlai pawl hruaitu hlui Vicca S aye a ni a, kumin February thla khan a thehlut a ni. Aye chuan Dy CM hian NPSC written examination-a inziak tling candidate-te chu interview stage-ah a puih theihna tura amah pan turin a ti a ni, a ti. Home ministry changtu ni bawk, Patton chu police department inrelbawlnaa inrawlh a, a duhsak zawngte laka a thuneihna dik lo taka hmangah a puh bawk. Dy CM hian chanchinbu lama post ruak tichhuak loin, police department-ah mi 1,135 a thun tawh tih a sawi bawk a ni.

Hetih lai hian Patton chuan a laka complaint thehlut chu thu dik lo, mimala tihhmingchhiat an tumna niin a sawi thung. 

Dimapur Naga Students’ Union (DNSU) chuan hripui leng vanga sorkarin sum lama harsatna a tawh phuhrukna pakhat atana diesel leh petrol-a Covid-19 chhiah a lak  titawp tura phutin, a tihtawp loh chuan state chhunga petrol pump kharsakah a vau. 

Nagaland sorkar hian April 28 aṭang khan Covid-19 chhiah hi diesel litre khatah Rs 5, petrol leh motor spirit dangah litre khatah Rs 6 a la a ni. State chhung dinhmun a ziaawm hunah hei hi tihtawp a nih tur thu a sawi. 

DNSU chuan fuel-a chhiah lak belh hi titawp tura phutin sorkarah ṭum hnih ngenna an lo thehlut tawh tih a sawi. State sorkar chu September 23 thleng hun pein, hemi chhunga an thil  phut a tihhlawhtlin loh chuan petrol pump-te chu an khar tir dawn a, hei bakah hian petroleum phurh luhna entry point te pawh an khar vek dawn tih an sawi a ni. 

Zirlai pawl chuan Covid-19 chhiah lak a nih vang hian state chhunga motor chuan man te, nitin mamawh thil mante pawh a san phah hle niin an sawi a, mi tam tak tan  harsatna a thlen a ni, an ti.