Assam Police-te'n naupang chhanchhuak

Assam Police-te chuan naupang kum ruk mi, an chenna Guwahati-a Jayanagar aṭanga rukbo,Adishri Dutta chu an chhanchhuak a, rukbo a nih kawnga inhnamhnawih mi paruk an man.

Adishri Dutta hi Delhi Public School-a pawl hnih zirlai niin, Guwahati aṭanga km 70 vela hla Khudro Bamunbari-ah chhanchhuah a ni. Rukbo a nih chhan hi tlanna sum duh vang nia sawi a ni. He thila inhnamhnawih Rumi Das, Anowar Hussain leh Nirmal Kalita-te chu Sarthebari-ah man an ni a, he thila inhnamhnawih mi dang Danesh Ali, Lokman Ali leh Tinku Ali-te pawh Barpeta-ah man zui an ni. Naupang rukbo nan hian car an hmang tih hriat a ni tawh a, car hi hrenzui a nih bakah chhuichian mek a ni.

Police-te chuan Adishri hi Anowar Hussain chenna inah nang chingin, hel pawl National Democratic Front of Bodoland (NDFB(S)) hnenah hlan a, tlanna sum cheng vaibelchhe khat phut turin a rubotute leh NDFB(S) te hian ruahmanna an siam a ni. Adishri nu leh pa, Dr. Diganta Dutta leh Dr. Aminakshi Dutta-te hi mi hausa leh thil tithei tak nia sawi a ni. Pawikhawihtu zinga mi, Rumi Das hi Dr. Diganta Dutta-te ina awm ṭhin niin, naupang a bo hnu hian a sim a thlak nghal a, amah pawh a bibo zui a ni. He inrukbona thlengah hian Rumi hi a ruahmantu zinga mi nia sawi a ni.

Chief Minister Sarbananda Sonowal chuan Assam Police-te hnathawh chu fakawm a tih thu sawin, naupang chhungte thinlung takin a lawmpui tih a sawi. Adishri nu leh pa te pawhin Assam police hna thawh chu fakin, rang taka an chet chhuah avanga an fanu an hmu let leh thei chu an lawm thu an sawi.