Maghalaya-ah zirlaite ngenna avangin JACATAM-te'n nawrh titawp

Maghalaya-a zirtirtu pawl pakhat Joint Action Committee of All Teachers Association of Meghalaya (JACATAM)-te'n zirtirtu dah ngheh an phut avanga lungawi lohna an lantir chu zirlaite ngenna avangin an titawp tih an puang.

JACATAM-te hian Nilaini khan Chief Secretary K.S. Kropha leh Commissioner and Secretary of Educa-tion DP Wahlang-te inbiakna an neihpui a, nawrh an kalpui mek chu tihtawp lailawk an remti a ni. Wahlang chuan state sorkarin sumah harsatna a tawk tih sawiin, zirtirtu sang chuang dah ngheh an nih chuan sorkarin cheng vaibelchhe 400 a mamawh belh dawn a ni, a ti. Hei hi tihhlawhtlin nghal mai theih a nih loh avangin JACATAM-te pawh rilru puitling tak pu a, sorkar sum harsatna hrethiam turin ngen an ni, a ti. Sorkar chuan zirtirtu dah nghet tur hian hma a la tih sawiin, nghak hram turin a ngen a, service rules chu Education policy thar hnuaiah siam ṭhat a nih tur thu Wahlang chuan a sawi bawk.

JACATAM chairman ED Nongsiang chuan, "Zirtirtu dah nghet tura kan hmalakna chu a la tawp lo a ni, nimahsela zirlai naupang leh an nu leh pa te ngenna avangin nawrh titawp lailawk a ni. Zirtirtute pawh nimin aṭang khan an hna ngai chhunzawm leh tura hriattir an ni" a ti. An kal leh zelna turah sorkar an ngaichang dawn tih sawiin, an lungawi lohna lantir avanga zirlai naupangte harsatna tawhah hriatthiamna an ngen tih a sawi.