Sharmila-i hospital aṭangin chhuak

Manipur 'Iron Lady' Irom Chanu Sharmila-i chuan a chawnghei tihtawp hnuah hun rei tak chhung hospital-ah enkawl zui a ni a, a hriselna a ṭhat chhoh zel avangin nimin khan hospital aṭangin a chhuak.

Sharmila-i hian Armed Forces (Special Powers) Act hlih a nih theih nan kum 16 chhung zet chawnghei a kalpui a, Agust 9 khan chawnghei titawpin, tuiril lam pek a ni. Doctor-te chuan hun rei tak chaw a nghei tawh avangin hun eng emaw chen chu hospital-ah enkawl zui a ngaih tur thu an lo sawi tawh a, ni 20 chhung Doctor-te hian turil lam peiin, an enkawl zui a ni. Sharmila hi picturesque Yoga and Naturopathy Spa centre, Langol hill range foothill-ah a khawsa rih dawn a, hei hi JNIMS hospital aṭanga km ruk vela hla a ni.

Hospital authority official chuan Sharmila-i hi chhuah ni tawh mah se a hriselna endik zui zel a nih tur thu sawiin, a hriselna chu ngaih pawimawh hmasak a ṭul thu a tarlang. Hospital aṭanga a chhuah hma hian Sharmila-i chuan Ukhrul-a 'public campaign against AFSPA' hmang tura a kal hmain Yoga and Naturopathy Spa centre-ah hian ni li vel a awm phawt tur thu a lo sawi tawh a ni. Public campaign neihna hman tur hi Imphal aṭanga km 84 vela hla a ni.

Manipur ‘Iron Lady' hian sawiselna nasa tak tawk mah se amah thlawptu mi tam tak an awm a, a bikin zirlai leh ṭhalaite chuan an thlawp ṭha hle. Political party ṭhenkhat pawhin an party ticket-a ding turin an sawm ve reng bawk a, mahse inthlan an hmachhawn turah party mal zawm loa Independent-a din a tum thu a sawi a ni. Sharmila hi Red Cross Manipur-te chuan a chenna tur Agartala khawpuiah an ngaihtuah sak bawk.