Tripura BJP-te'n all party meet neih phut

Tripura Bharatiya Janata Party (BJP) te chuan tun hnaia an state chhunga hnam leh hnam inkara buaina chhuak chungchangah all-party meeting neih an phut thu an sawi.

Member pariat awmna BJP State unit-te chuan Zirtawpni khan an president Biplab Deb hoin Governor Tathagata Roy chu Raj Bhavan-ah an hmu a, an thil phut an thlen. BJP president chuan August 23-a state khawpui Agartala-a tharum thawhna thleng chu BJP state unit chuan pawi a ti tak zet tih sawiin, chinfel thuai an duh thu leh tun hnuah thleng nawn tawn tawh lo se an duh tih a sawi. Governor pawhin tribal leh non-tribal-te inkara buaina chhuak chu pawi a tih thu a lo hrilh ve bawk.

Tribal-te tharum thawhna thleng avang hian BJP state unit aiawhte chuan Union Minister Rajnath Singh chu Delhi-ah an hmu tawh a, remna leh muanna a awm leh theih na turin tribal leh non-tribal aiawhte telin all party meeting neih an duh thu an lo thlen tawh a ni. Hetih lai hian political party pathum – Indigenous Nationalist Party of Tripura (INPT), National Council of Tripura (NCT) leh Tripura State Party (TSP) te chuan joint press conference neiin, tharum thawhna thleng leh mi tam tak hliam tawrhna thlen chhan dik tak chhui chhuah a nih theih nan Central Bureau of Investigation (CBI) chhui tir an phut thu an tarlang. INPT president BK Hrangkhawl chuan kum 50 chhunga thil thleng tawh zingah chuan thil pawi ber zinga mi a ni a ti a, an dem tak zet tih a sawi.

Agust 23 khan Tripura khawpui Agartala-ah ‘Tipraland’ Statehood Demand Day' lawm niin Indigenous People's Front of Tripura (IPFT) ten kawng an zawh a, tharum thawhna thleng zuiin civil mi, sumdawnna leh dawr leh lirthei eng emaw zat hal a ni. Tribal-te hian kum 1984-2008 chhung khan kum tin August 23 chu Autonomous District Council (ADC) formation day atan an hmang ṭhin a, mahse kum 2009 aṭang khan IPFT te chuan he ni hi 'separate statehood demand day' atan an hmang ta zawk a ni. Agartala-ah hian dan leh thupek khauh zawka kenkawh a nih theih nan Section 144 puan a lo ni tawh.

Eptu party leh pawl dang eng emaw zat chuan he thil thleng hi an dem thu an sawi tawh a, chinfel thuai a nih theih nan CBI kuta hlan an duh thu an sawi a ni.