Manipur-ah High Court building hlui bei

Manipur-a High Court building hlui chu tu tih hriat loh ten an bei a, thil pawimawh eng emaw zat a kang chhia. Manipur Police-te chuan Inrinnia Imphal-a High Court building hlui bei a, bungraw ṭhenkhat tihchhiat a nih vangin thubuai an ziak lut.

High Court building beih a nih avang hian bungrua eng emaw zat a chhiat bakah official document pawimawh ṭhenkhatte tihchhiat a ni. State Law Minister Irengbam Hemochandra leh official ṭhen-khat chuan Inrinni vek khan pawikhawihna thlenna hmun hi an tlawh nghal. Room 17 vel a kang chhia a, computer ṭhahnem tak a kang chhe bawk.

Court building hlui hi public prosecutor leh government advo-cate-te chuan an luah a, hna thawktu mi 50 vel an awm a ni. Official chuan document kang ral ta ṭhenkhat hi court thu pawimawhte a nih thu sawiin, high court complex tharah a tam zawk chu dah luh hman a nih thu a sawi.

Hetih lai hian kar kalta Zirtawpni khan mi tu tih hriat loh te chuan Thoubal district-a District Transport Office an bei a, hei hi Chief Minister Okram Ibobi Singh chenna in aṭanga hla lote nia sawi a ni. Pawikhawihtute hian sorkar thil pawimawh eng emaw zat an tih chhiat bakah bungrua eng emaw zat an suasam a ni. Police-te chuan pawikhawihtute hi an la man chhuak lo nia tarlan a ni.

Thu neitute chuan pawi-khawitute hian school building leh hmun ṭhenkhata sorkar office-te an bei zui leh mai ang tih a hlauhawm thu an sawi.