Manipur : CM-in Maha Kumbh mela neihna Prayagraj tlawh

Manipur chief minister N Biren Singh, a cabinet minister leh Legislative Assembly member ṭhenkhat chuan Ningani, February 6 khan Uttar Pradesh-a Maha Kumbh hman mekna Prayagraj an tlawh.

Chief Minister Singh leh a thawhpuite hian Triveni Sangman lui, Uttar Pradesh-ah inthen thianghlimna hun an nei dawn a, hmarchhak bial mipuiten remna leh muanna bakah hlawhtlinna an neih theih nan ṭawngṭaisakna hun an hmang bawk ang. CM chuan Manipur-ah hma hun eng zawk leh inlungrualna a awm theih nan mi zawng zawng chu ṭawngṭaipui turin a sawm nghal bawk a, he hun hian mi zawng zawng tan malsawmna a thlen ngei a beisei thu a sawi.

Kumin January thlaa Uttar Pradesh minister Dinesh Khatik-a'n Manipur a tlawh khan CM Sing hhi Maha Kumbh Mela hmang turin hian a sawm a, sawmna lehkha pawh a lo pe tawh a ni.

Manipur-ah hian May 2023 aṭang khan tualchhunga buaina chhuakin, buaina chhuakah hian mi 250 chuang an thi tawh a, mi sang tel in sahimna zawngin an chenna in an chhuahsan tawh bawk a ni.

February 5 khan Manipur CM hi sorkar laipui hruaitute hmu turin Delhi a pan a, state minister pathum leh BJP MLA pali te pawhin chartered flight hmangin Delhi an pan ve nghal a, BJP MLA Karam Shyam, Sanasam Premchandra, Kh Ibomcha leh Sapam Kunjakeshwor (Keba) ten an ṭawiawm bawk official-te chuan an sawi. CM hian union home minister Amit Shah chu state chhung buaina leh venhimna kalpui dan chungchang leh an dinhmun a sawipui a ni.