Tripura : Amit Shah-a'n Tripura CM fak

Union home minister Amit Shah chuan Nilaini khan Tripura chief minister Prof. Dr. Manik Saha chu ṭhalaite hna pek chungchang langtlang tak leh thlei bik nei loa a kalpui avangin a fak.

Union Home Minister chuan he thu hi Tripura sorkarin job offer distribution programme, February 5-a a buatsaihah virtual hmangin a sawi a ni.

He hun hi Swami Vivekananda Maidan-ah neih a ni a, chief minister Prof. Dr. Manik Saha leh cabinet minister- Pranajit Singha Roy, Ratan Lal Nath, Sushanta Chowdhury, Santana Chakma, Shukla Charan Noatia, Tinku Roy, Bikas Debbarma leh Sudhangshu Das te an tel.

Sorkar laipui chuan Tripura sorkar tan hian state chhungah hmasawnna a awm theihnan hma nasa takin a lakpui a ni. Union Home Minister chuan Tripura CM Saha chu ṭhalai 2,808 hnenah thlei bik nei loa, an thiamna avanga hna a pek avangin a lawm thu a hrilh a, hna hmu tharte chu lawmpuina a hlan nghal bawk. Heng ṭhalaite hi PM Modi Viksit Tripura Viksit Bharat Abhiyan zingah an tel tawh dawn a ni, tiin a sawi.

Swami Vivekananda Maidan-ah hian hna thawk tura lak tharte hi offer letter hlan nghal niin, heng mite hi department 37 hnuaiah lak an ni.

CM Saha chuan kum li liam ta chhung khan an state-a hna thawh nei lo, unemployment rate chu a tlahniam tawh hle tih sawiin, kum 2023-24 chhunga Tripura unemployment rate chu 1.7% niin, ram pum huapa 3.2% aiin a hniam hle a ni, a ti.