Assam CM-i'n Central fund pe chhuak turin Modi ngen

Assam Chief Minister Sarbananda Sonowal chuan Prime Minister Narendra Modi chu Pathianni khan New Delhi-ah hmuin tuilian leh leimin avanga an state-in harsatna nasa tak a tawh mekah ṭanpuina tur sum pe chhuak turin a ngen.

Assam CM hi State Finance Minister Himanta Biswa Sarma chuan zuiin, nimin khan Prime Minister Narendra Modi a hmu a, kawng hrang hranga an state-in sum leh pai a harsatna a tawh mekte sutkian dan tur a sawipui. Modi chuan Sonowal hnenah an state-in tuilian leh leimin nasa tak avanga harsatna an tawhah a tawrhpui thu a sawi bakah, ṭanpuina awm thei te ngaihtuah sak an nih tur thu a lo tiam tawh a ni. Assam CM hian an inkawm chhung hian tuilian leh leiminin a tihchhiatte siam ṭhat lehna tura sum mamawh te, thlai chingtu leh in leh lo chante chhawmdawlna pek an ngaih thu thlenin, Prime Minister chu hmalakpui turin a sawm a ni.

Assam state sorkar chuan sorkar laipuiah Detailed Report (DR) a thehlut tawh a,
ṭanpuina sum an dawn thuai beisei a ni. Sonowal hian thuthar thehdarhtute kawm zui nghalin, "Modi nen inkawmna hun
ṭha tak kan nei thei hi ka lawm a, Assam-in tuilian leh leimin avanga harsatna nasa tak a tawh mekte kan sawi dun a, sorkar aṭanga chhawmdawlna awm thei angte kan ngaihtuah a ni. Inkawmna kan neih chhung hian ka ministry tihlenna tur emaw State BJP president election chungchang emaw kan sawi lo" a ti.

Sorkar laipui-a inter-ministerial team-te chuan Assam an pan dawn a, anni hian tuilianin a tihchhiat, leilung luang ral leh in leh lo chhia te an zirchiang dawn a ni. Kumina Assam-in tuilian a tawrh hi kum eng emaw zat chhunga a nasat ber ṭum ni hial a sawi a ni. Tuilian avanga harsatna tuar mi nuai chuang zet an awm a, inkalpawhna kawngpui leh lei chhia ṭhahnem tak a awm. Himna zawnga mahni in leh lo chhuahsan ṭhahnem tak awmin, thlai chingtute pawh a tuar nasa ber zinga mi an ni. State sorkar chuan kawng hrang hrangin tuilian laka mipuite himna tur ngaihtuahin hma a la nghal mek bawk.