Sorkar laipuiin hmarchhak mite himna ngai pawimawh tawk lo : NESO

Hmarchhak zirlai pawl, North East Students Orga-nisa-tion (NESO) chuan sorkar laipui chu hmarchhak mite himna ngaipawimawh tawk loah puhin, hmarchhak mite harsatna tawh ṭhin chu sukiang thuai turin an phut tih an sawi.

All Manipur Students Union (AMSU)-te chuan Pathianni khan Imphal West-a DM college ground-ah an din champha vawi 51-na an lawm a, he huna thusawitu NESO advisor Samujjal Bhattacharyya chuan, "Hmarchhak miten state danga harsatna kan tawk ṭhin hi a pawi hle a, kan dikna leh chanvo humhim a nih theih nan kan bei zel dawn a ni" a ti. Bhattacharyya chuan hmarchhakah zirlai pawl eng emaw zat a awm tih sawiin, zirlai mai bakah hmarchhak mipuite tan hna ṭha takin an thawk a , chung zingah chuan All Manipur Students Union (AMSU) pawh a tel a ni, a ti. AMSU-in an state mipui tana a thawhna chu a thlawn lo tih sawiin, chhunzawm zel turin a duh tih a sawi a, chak zawka AMSU a kal theih nana rawtna thlen ṭhin turin a fuih bawk.

NESO advisor chuan ṭhen-awm ram Bangladesh aṭanga hmarchhak hmun hrang hranga dan loa lut ṭhinte chu dan an ṭul thu sawiin, hemi kawngah hian zirlai pawlte chuan mawhphurna sang tak an nei tih a sawi. AMSU-te'n Manipur-a skill university din an phut chu awm a tihpui thu sawiin, an hmalakna te chu NESO chuan a thlawp zel dawn a ni, a ti. Inner Line Permit (ILP) khauh zawka kenkawh a ṭul thu sawiin, chu chuan dan loa pemlut mi tam tak a dang thei dawn a ni a tibawk.

All Manipur Students Union (AMSU) din champha lawmnaah hian AMSU president Sanasam Subha-chandra, NESO chairman Samuel Iyrwa, NESO secretary general hlui Gumjum Haider, NESO Co-ordinator Pritam Sonam, All Arunachal Pradesh Students’ Union president Kanta Lapung-te leh hmarchhak students union palai eng emaw zat an tel a ni.