Manipur-ah pawl pahnihin ni li awh nawrh huaihawt dawn

Outer Manipur Tribals’ Forum (OMTF) leh Joint Action Commi­ttee Against Anti Tribal Bills (JAC-AATB) te chuan September 1
aṭangin “tribal areas”-ah ni li awh general strike an huaihawt dawn.

Pawl pahnihte chuan Mani­pur sorkar-in state assembly neih leh turah ‘Regulation of Non-Local People of Manipur bill-2016’ put luh a tum nia sawiin, hei hi an duh lo tih an tarlang. OMTF leh JAC-AATB-te chuan Manipur Assembly-in August 31, 2015-a a lo pass tawh Anti Tribal Bill pathum-te chu chinfel a nih hma loh chuan eng bill mah assembly-ah put luh an remti lo tih an sawi a, tribal martar mi pakuate dikna leh chanvo chu humhim sak an tum tlat thu an sawi bawk.

OMTF leh JAC-AATB aiawh­te chuan Pathianni khan joint meeting neiin, lungawilohna lantir nana general strike huaihawt tur hian thutlukna an siam a ni. September 1 zanlai aṭanga ṭanin September 5 zanlai thleng kalpui tur a ni ang. Outer Manipur Tribals’ Forum (OMTF) hi pawl hrang hrang Thadou Inpi, United Naga Council (UNC), Hmar Inpui, Mizo People Convention (MPC) leh Zomi Council-te inzawmkhawmna pawl pakhat a ni.

Joint meeting-ah hian 'Tribal Unity Day' hmandan tur chungchang sawiho a ni bawk. August 31 khian South Manipur-a Churachandpur-ah “tribal movement” kum khat tlin lawmna 'Tribal Unity Day' hi hman a ni dawn a ni.

Pawl pahnihte hian an thil phut hrang hrangte chu Manipur Governor hnenah thlen an tum thu sawiin, UNC president Gaidon Kamei, OMTF leh Zomi Council (MC) hruaitu Dr. R. Sanga-te hnenah pawh memorandum hi thehluh an tum thu an sawi. Joint meeting hian tunhnaia Tripura tualchhung buaina thleng chu an dem thu sawiin, Tripura sorkar chuan tribal-te himna a ngaihthah niin an puh bawk.