Meghalaya : Japan nen inthlunzawmna ṭha nei turin hma la

Meghalaya chief minister Conrad K. Sangma chuan an state leh Japan in inthlunzawmna ṭha zawk an neih theihnan sorkarin hma a lak thu a sawi.

Chief Minister Sangma hian Zirtawpni liam taa India-Japan Conclave vawi 5-na, Guwahati-a neihah he thu hi sawiin, Meghalaya ṭhalaite chu Japan-a hnathawk tur leh, thiamna lama hmasawnna kawngah theihna an neih thu a sawi a ni.

CM Sangma chuan an state-in Japan-ah nurse 3,000 thawn a tum thu sawiin, hemi atan hian traning programme leh Japan ṭawng zirna pawh a buatsaih thu a sawi. Tunah hian Meghalaya aṭanga kal nurse 50 chu Japan-ah hna an thawk tawh a, midang 500 in training an nei mek a ni, a ti. Kum li kum nga hnuah chuan nurse thawn theih zat hi 5,000 ah pawh a pun theih thu a sawi bawk. Sangma hi Japan-a nurse batch hmasa ber an thawn ṭum pawhin a kal ve a ni.

Healthcare bakah sector hrang hrangah thawh hona tur zawn mek a ni a, sorkar chuan khawvel hmun hrang hranga hnathawh theihna tur hun remchang siamsak an tum bawk tih CM chuan a sawi. Meghalaya sorkar hi Japan Yats Corporation nen thawk dunin, Shiitake mushroom chin leh tharchhuahna kawnga tunlai khawl changkang hman tih lar chu an hmachhawp a ni bawk a ni.

Japan ambassador Ono Keiichi leh CM Sangma te chuan inbiakna an nei bawk a, Meghalaya kaltlanga ram pahnihte thawh dunna ṭha leh nghet zawk siam dan turte an sawidun.