Sikkim : CM kaihhruaiin official-ten Maha Kumbh Mela tlawh

Sikkim chief minister Prem Singh Tamang kaihhruaiin high ranking official, mi 72 te chuan Uttar Pradesh-a Maha Kumbh Mela neihah Triveni Sangam tlawhin, in then thianghlimna hun an hmang. An zingah hian Assembly speaker, deputy speaker, cabinet minister leh MLA eng emaw zat an tel.

Uttar Pradesh chief miniter Yogi Adityanath chuan CM Tamang hi Maha Kumbh Mela hmanpui tur hian a lo sawm tawh a ni.

February 7 thleng khan mi vbc 40 chuang chu Triveni Sangam lui, Prayagraj-ah hian in then thianghlimna neiin an inchiah tawh.

Maha Kumbh Mela hi India ram leh khawvel hmun hrang hrang aṭangin tlawhtu an ṭhahnem hle. Kalpavasis, mi thianghlim leh sakhaw lama mi inpe te aṭangin mi mtd 10 in an tlawh tawh a ni.

Ram hruaitu challang tak tak zingah prime minister Narendra Modi, union home minister Amit Shah leh defence minister Rajnath Singh te pawhin Triveni Sangam hi an tlawh a, Uttar Pradesh CM Yogi Adityanath leh a cabinet minister te pawhin inthen thianghlimna hi an nei tawh bawk. President Droupadi Murmu pawh vawiin hian Triveni Sangam hi tlawh a tum.

Anni bakah Uttar Pradesh governor Anandiben Patel, Rajasthan CM Bhajan Lal Sharma, Haryana CM Nayab Singh Saini, Manipur CM N. Biren Singh leh Gujarat CM Bhupenfra Patel te pawhin Triveni Sangam luiah an lo inchiah tawh. Union minister zingah Gajendra Singh Shekhawat, Arjun Ram Meghwal leh Shripad Naik te pawh an kal tawh bawk.

Olympic-a medal la tawh Saina Nehwal, cricketer Suresh Raina, international wrestler The Great Khali, poet Kumar Vishwar, choreographer Remo D'Souza leh senior politician zingah Akhilesh Yadav leh Ravi Shankar Prasad te pawhin Maha Kumbh Mela 2025 hi an chhim a ni.