Meghalaya-in National Games 39-na thleng dawn

Meghalaya chu kum 2027-a National Games vawi 39-na neih tur thleng tura tihfel a ni.

State sports and youth affairs minister Shakliar Warjri chuan Pathianni khan Indian Olympic Association (IOAS) leh sorkar laipui chuan Meghalaya-in Games thlen a dilna chu an pawm ta tih a sawi. State khawpui, Shillong chu 39th National Games main host city a ni dawn a, Tura leh Jowai-ah pawh intihsiakna hrang hrang neih a ni bawk ang. Meghalaya sorkar hian an state chhunga infiamna hmun hrang hrang - Shillong-a JN Sports Complex, Jaintia Hills-a Wajiajer Stadium leh Tura-a PA Sangma Integrated Sports Complex te chu a lo ti changtlung tawh a, infiamna lam tih hmasawnna turin kawng hrang hrangin hma a la mek bawk.

Meghalaya-in National Games a thleng tur chu state chhunga ṭhalaite tan hmasawnna lian tak a nih tur thu Warjri chuan a sawi a, sorkarin ṭhalaite tan theihtawp chhuah a tum thu a sawi bawk. Hei bakah Uttarakhand-a National Games neih mekah state chhunga infiammite chet ṭhat avangin lawmthu a sawi bawk a ni.