World Bank-in Assam tan vaibelchhe 980 pe chhuak

World Bank chuan Brah-maputra hmanga waterway lama Bangladesh leh South East Asian ramte nena industry leh sumdawnna lama hmalakna turin Assam sorkar hnenah cheng vaibelchhe 980 a pe.

Assam Industries and Commerce Minister Chandra Mohan Patowary chuan, "Brah-ma-putra waterway hian bungrua man to tak taka chawk luh chu a chhawk thei dawn a ni. Assam chu South East Asian ramte nen industry leh sumdawnna kalpui kawngah nasa takin a pui thei ang" a ti. World Bank chuan hnathawhna tur sum vaibelchhe 980 a pe chhuak a, hna ṭan thuai beisei a ni. Hei hi sorkar laipuiin Act East Policy a kalpui meka hmalakna pakhat a ni a, hmarchhak kaltlanga ṭhenawm ram Bangladesh leh South East Asian ramte nena industry leh insumdawn tawnna kawnga huang zauh nana hmalakna a nih thu minister chuan a sawi.

Brahmaputra waterway hi hawn a nih hunah chuan Assam sorkar chuan Bangladesh leh West Bengal te nen sumdawnna cheng vaibelchhe 25 hu a kalpui thei tura ngaih a ni a, Thailand, Myanmar, Laos, Cambodia leh South East Asian ram dangah pawh huang zauh zel tum a ni. Patowary chuan Assam leh South East Asia chu boruak lamah inthlun zawmna nei leh turin sorkar laipui chuan hma a la leh mek niin a sawi a, Gopinath Bordoloi International Airport chu tun dinhmunah a hming chauhin international airport a ni a, ram dang khawiah mah a thlawh tir loh bakah ram dang thlawhtheihna ṭum pawh a awm lo, a ti. Hei hi hriain thla hmasa khan Regional Connectivity Policy chungchangah Delhi-ah meeting neih a ni a, he hunah hian Assam-in South East Asian ram te nena van boruaka inkalpawhna ṭha a neih theih na tura international flight dahbelh turin sorkar laipuiah ngenna thlen a ni a, hei hi sorkar laipui pawhin a pawmpui a ni, a ti bawk.