Tripura-a Indo-Bangla Border-ah Buaina a chhuak

West Tripura-a Nutanba­zar area, Sonamura-ah dan loa bawng tawlhruk dan tuma Border Security Force-te hmalaknaah buaina chhuakin, mi pasarihin hliam an tuar a, an zingah hian BSF mi pathum an tel.

Buaina chhuahna hmun hi Indo-Bangla border bul hnai a ni a, a kianga thingtlang khua mi
ṭhenkhatten ramri kaltlanga bawng tawlhruk an tum chu BSF-te hian dangin, buaina hi a chhuak zui ta a ni. BSF lam chuan dan kalhin bawng puitling 15 vel chu ramri kaltlang hian thawnchhuah an ni tawh niin an sawi. Hei hi tihtawp tumin BSF-te hian an dang a, buaina a chhuak zui ta a ni. Civil mi pali leh BSF mi pathum ten hliam an tuar a, ngaihtuahawm lutuk erawh an ni lo nia tarlan a ni. He buaina chhuak vang hian lirthei leh bungrua ṭhenkhat tihchhiat a awm a, boruak a sosan tak tak hmain Tripura State Rifle leh BSF official-te chuan buaina chhuahna hmun hi an thleng a, khaw mite nen inbiakna an neih hnuah boruak a ziaawm chho nia hriat a ni.

He thil thlengah hian police-te chuan thubuai pahnih an ziaklut. Hetih lai hian BSF-te hian Sonamura khaw mite hi an hnuaichhiah bakah, an camp-ah te bawng an kawl luih sak ṭhin niin an sawi. Sonamura-ah hian bawng leh ransa dang tawlh rukna a hluar hle nia sawi a ni.