AP BJP palaiten Union Railway Minister an dawr

Arunachal Pradesh Bharatiya Janata Party (BJP) president Tapir Gao leh party office bearer-te chuan Railway Minister Suresh Prabhu chu New Delhi-ah hmuin, Pasighat rel kawng siam ṭhat chung-chang an sawipui.

Tapir Gao chuan Pasighat (AP)-Murkong Selek railway station (Assam) km 35 thui chu chei ṭhaa tilian turin minister hnenah ngenna a thlen a ni. Rel kawngin a paltlang ram neitute chu zángnadawmna dik tak chauh phut tura ngen an nih thu sawiin, hmasawnna tiṭhuanawp lo turin ram neitute chu ngen an nih thu minister a hrilh bawk. Pasighat rel kawng hi siam ṭhat a nih chuan a bul hnaia awm Siang leh Dibang Valley te chuan an chhawr ṭangkai thei hle dawn niin a sawi bawk.

Gao chuan rel kawng ṭha tak a awm chuan nasa takin tourism lamah an state-in hma a sawn theih tur thu sawiin, horticulture leh agriculture lamah pawh hmasawnna a thlen dawn tih a sawi. Pasighat chu horticulture lama Arunachal Pradesh innghahna pawimawh tak a ni a ti a, thlai thar chhuahte chu India ram hmun danga thawn chhuah theih beisei a ni thu Goa chuan a sawi bawk.