Tripura regional tribal party-te ṭawng chhuak

Tripura-a regional tribal party pathum te chuan darkar 48 chhunga boruak munaawm a awm leh theih nana hma la turin state sorkar an phut.

August 23-a Agartala-a Indigenous Peoples’ Front of Twipra (IPFT)-te'n buaina an chawhchhuah avanga buaina kal zelah regional party pathum - Indigenous Nationalist Party of Tripura (INPT), National Council of Tripura (NCT) leh Tripura Peoples’ Front (TPF) te chuan state sorkar chu hma la chak tawk loah an puh. Thuchhuah inṭawm an siamah chuan, buaina chhuah chhan chhui chiang tur hian Central Bureau of Investigation (CBI) koh luh an phut tih an tarlang. Twipra Students Federation (TSF) leh Indigenous People's Front of Tripura (IPFT)-te chuan CBI chhui tir an phut thu an lo sawi tawh a, hetih lai hian state sorkar chuan chhui chiang tura CBI ko lut turin hmalakna a nei lo niin an sawi.

He buaina chhuakah hian mi ṭhahnem takin hliam an tuar a, he thila inhnamhnawih mi 28 te thlalak chu police te chuan an tlangzarh. INPT president Bijoy Kumar Hrangkhwal leh TPF president Patal Kanya Jamatia-te chuan buaina chhuahna hmun, Agartala-a MBB University, BBM College, Pragati Vidya Bhawan, Umakanta Academy leh school eng emaw zat an tlawh a, boruak muanawm tak a awm leh thuai an duh thu an sawi. August 24 khan Pragati Vidya Bhawan chuan exam a buatsaih a, tribal zirlaite chuan an hmachawn lo thung.

Hetih lai hian Tripura Chief Minister Manik Sarkar chuan boruak ralmuang a awm leh theih nan pawl hrang hrangte chu thawhpuiah a sawm. Sarkar chuan chi bil inkara inthliar hranna awm chu theihnghilh a, inpumkhatna rilru pu turin mipuite chu a sawm bawk.